سورة النحل

وَاللَّهُ أَنزَلَ مِنَ السَّمَاءِ مَاءً فَأَحْيَا بِهِ الْأَرْضَ بَعْدَ مَوْتِهَا ۚ إِنَّ فِي ذَٰلِكَ لَآيَةً لِّقَوْمٍ يَسْمَعُونَ

اور اللہ آسمان سے پانی برسا کر اس سے زمین کو اس کی موت کے بعد زندہ کردیتا ہے۔ یقیناً اس میں ان لوگوں کے لئے نشانی ہے جو سنیں۔

زمین خشک اور بالکل بے آب و گیاہ پڑی ہوتی ہے مگر برسات کے موسم میں ہر طرف جڑی بوٹیاں، گھاس، درخت،پودے وغیرہ از خود پیدا ہونے لگتے ہیں جن کے بیج مدتوں پہلے زمین میں دبے ہوئے تھے، پھر اس موسم میں مینڈک اور کئی قسم کے حشرات الارض بھی پیداہوجاتے ہیں جن کا نام ونشان تک مٹ چکاہوتاہے اور یہ منظر تم اپنی زندگی میں بار بار دیکھتے ہو۔ بالکل ایسی ہی صورت حال انسان کو دوبارہ پیدائش کی ہوگی ۔ انسان کا جسم خواہ مٹی میں مل کر مٹی بن چکاہو، نفخہ صور ثانی یا روحانی قسم کی بارش سے دوبارہ جی اٹھیں گے۔