سورة النحل - آیت 31

جَنَّاتُ عَدْنٍ يَدْخُلُونَهَا تَجْرِي مِن تَحْتِهَا الْأَنْهَارُ ۖ لَهُمْ فِيهَا مَا يَشَاءُونَ ۚ كَذَٰلِكَ يَجْزِي اللَّهُ الْمُتَّقِينَ

ترجمہ مکہ - مولانا جوناگڑھی صاحب

ہمیشگی والے باغات جہاں وہ جائیں گے جن کے نیچے نہریں بہہ رہی ہیں، جو کچھ طلب کریں گے وہاں ان کے لئے موجود ہوگا۔ پرہیزگاروں کو اللہ تعالیٰ اسی طرح بدلے عطا فرماتا ہے۔

تسہیل البیان فی تفسیر القرآن - ام عمران شکیلہ بنت میاں فضل حسین

جو شخص نیک عمل کرے گا خواہ مرد ہو خواہ عورت، ہاں یہ ضروری ہے کہ وہ ہو مومن تو ہم اسے بڑی پاک زندگی عطا کریں گے اور ان کے بہترین اعمال کابدلہ بھی ضرور دیں گے جیساکہ قرآن میں ہے۔ ﴿وَمَا عِنْدَ اللّٰہِ خَیْرٌ لِّلْاَبْرار﴾ اللہ کے پاس کی چیزیں نیک کاروں کے لیے بہت اعلیٰ ہیں اورجگہ ہے۔ آخرت خیر اور باقی ہے۔ نبی صلی اللہ علیہ وسلم سے خطاب کرکے فرمایا :’’تیرے لیے آخرت دنیا سے اعلیٰ ہے۔‘‘ پھر فرماتاہے: متقیوں کے لیے آخرت میں جنت عدن ہے۔ جہاں وہ رہیں گے جس کے درختوں اور محلوں کے نیچے سے برابر چشمے ہر وقت جاری ہیں جو چاہیں گے پائیں گے۔