سورة النحل - آیت 18

وَإِن تَعُدُّوا نِعْمَةَ اللَّهِ لَا تُحْصُوهَا ۗ إِنَّ اللَّهَ لَغَفُورٌ رَّحِيمٌ

ترجمہ مکہ - مولانا جوناگڑھی صاحب

اور اگر تم اللہ کی نعمتوں کا شمار کرنا چاہو تو تم اسے نہیں کرسکتے۔ بیشک اللہ بڑا بخشنے والا مہربان ہے

تسہیل البیان فی تفسیر القرآن - ام عمران شکیلہ بنت میاں فضل حسین

اللہ کی نعمتوں کاشمار ناممکن ہے: یہ چند موٹی موٹی چیزیں ذکر کی گئی ہیں لیکن اگرتم ان کی جزئیات میں یا دوسری چیزوں میں غور کرو تو اللہ کی اس قدر نعمتیں ہیں کہ تمہاری گنتی میں بھی نہیں آ سکتی ۔ انسان کو چاہیے تو یہ تھاکہ ان نعمتوں کی وجہ سے وہ اللہ کاشکرگزار بنتامگر اس نے اُلٹا اللہ کے شریک بناناشروع کردیے ۔ پھر بھی اللہ ان کے ایسے جرائم سے درگزر کرتے ہوئے انھیں معاف فرمادیتاہے۔ تمہاری تقصیروں سے تجاوز کرلیتاہے۔ بڑا ہی رحیم ہے تو بہ کے بعد عذاب نہیں کرتا۔