سورة ھود - آیت 123

وَلِلَّهِ غَيْبُ السَّمَاوَاتِ وَالْأَرْضِ وَإِلَيْهِ يُرْجَعُ الْأَمْرُ كُلُّهُ فَاعْبُدْهُ وَتَوَكَّلْ عَلَيْهِ ۚ وَمَا رَبُّكَ بِغَافِلٍ عَمَّا تَعْمَلُونَ

ترجمہ مکہ - مولانا جوناگڑھی صاحب

زمینوں اور آسمانوں کا علم غیب اللہ تعالیٰ ہی کو ہے، تمام معاملات کا رجوع بھی اسی کی جانب ہے، پس تجھے اس کی عبادت کرنی چاہیے اور اسی پر بھروسہ رکھنا چاہیے اور تم جو کچھ کرتے ہو اس سے اللہ تعالیٰ بے خبر نہیں۔

تسہیل البیان فی تفسیر القرآن - ام عمران شکیلہ بنت میاں فضل حسین

آسمان و زمین کے ہر غیب کو جاننے والا صرف اللہ تعالیٰ عزوجل ہی ہے۔ اسی کی سب کو عبادت کرنی چاہیے۔ معاملات سب اُسی کی طرف لوٹائے جاتے ہیں جو بھی اس پر بھروسہ رکھے گا وہ اس کے لیے کافی ہے۔ حضرت کعب رضی اللہ عنہ فرماتے ہیں کہ تورات کا خاتمہ بھی انھی آیتوں پر ہے۔ اللہ تعالیٰ مخلوق میں سے کسی کے عمل سے بے خبر نہیں۔ (تفسیر طبری: ۱۵/ ۵۴۵، ح: ۱۸۷۶۷)