سورة ھود - آیت 73

قَالُوا أَتَعْجَبِينَ مِنْ أَمْرِ اللَّهِ ۖ رَحْمَتُ اللَّهِ وَبَرَكَاتُهُ عَلَيْكُمْ أَهْلَ الْبَيْتِ ۚ إِنَّهُ حَمِيدٌ مَّجِيدٌ

ترجمہ مکہ - مولانا جوناگڑھی صاحب

فرشتوں نے کہا کیا تو اللہ کی قدرت سے تعجب کر رہی (١) ہے؟ تم پر اے اس گھر کے لوگوں اللہ کی رحمت اور اس کی برکتیں نازل ہوں (٢) بیشک اللہ حمد و ثنا کا سزاوار اور بڑی شان والا ہے۔

تسہیل البیان فی تفسیر القرآن - ام عمران شکیلہ بنت میاں فضل حسین

فرشتے کہنے لگے کہ آپ اللہ کی قضا و قدر پر کس طرح تعجب کا اظہار کرتی ہو جبکہ اس کے لیے کوئی چیز مشکل نہیں؟ اللہ جو چاہے وہ اس کے کرنے پر قادر ہے۔ اور سیدنا ابراہیم علیہ السلام کے گھر والوں پر تو اللہ کی رحمتیں اور برکتیں نازل ہوتی ہی رہی ہیں۔ اور آئندہ بھی ہوتی رہیں گی۔ جن میں سے ایک ہونے والا بچے اسحاق کی پیدائش بھی ہے۔ اللہ تعالیٰ تعریفوں والا اور بزرگ ہے۔