سورة ھود - آیت 66
فَلَمَّا جَاءَ أَمْرُنَا نَجَّيْنَا صَالِحًا وَالَّذِينَ آمَنُوا مَعَهُ بِرَحْمَةٍ مِّنَّا وَمِنْ خِزْيِ يَوْمِئِذٍ ۗ إِنَّ رَبَّكَ هُوَ الْقَوِيُّ الْعَزِيزُ
ترجمہ مکہ - مولانا جوناگڑھی صاحب
پھر جب ہمارا فرمان آپہنچا (١) ہم نے صالح کو اور ان پر ایمان لانے والوں کو اپنی رحمت سے اسے بھی بچا لیا اور اس دن کی رسوائی سے بھی، یقیناً تیرا رب نہایت توانا اور غالب ہے۔
تسہیل البیان فی تفسیر القرآن - ام عمران شکیلہ بنت میاں فضل حسین
صالح علیہ السلام کی ہجرت: عذاب نازل ہونے سے پیشتر ہی صالح علیہ السلام اور ان پر ایمان لانے والوں کو حکم الٰہی ہوا۔ چنانچہ آپ علیہ السلام اپنے ساتھیوں کو لے کر فلسطین کی طرف روانہ ہو گئے۔ اور سب لوگ اس ذلت کے عذاب سے بچ گئے جو مجرم قوم پر نازل ہونے والا تھا۔