آیت ۹۵ میں بھی مخاطب اُمت کو سمجھایا جارہا ہے کہ شک و شبہ میں بھی نہیں پڑنا اور نہ اللہ کی آیات کی تکذیب کرنا ورنہ نقصان اٹھانے والوں میں سے ہو گے۔ شک اور تکذیب کے کئی مراحل ہیں، سب سے پہلے شک پیدا ہوتا ہے۔ پھر دلیل دی جاتی ہے۔ پھر جھگڑا شروع ہو جاتا ہے پھر تکذیب کا درجہ آجاتا ہے۔ یعنی ایسا انسان یکسر اللہ کی آیات کا انکار کردیتا ہے۔ پھر جب وہ اس تکذیب میں پختہ ہو جاتا ہے تو حق بات قبول کرنے پر آمادہ نہیں ہوتا اس سے قبول حق کی استعداد ہی چھن جاتی ہے۔ اور یہی وہ کیفیت ہوتی ہے جسے اللہ تعالیٰ نے قرآن میں کئی مقامات پر مہر لگ جانے سے تعبیر کیا ہے۔