سورة الواقعة

فَلَا أُقْسِمُ بِمَوَاقِعِ النُّجُومِ

پس میں قسم کھاتا ہوں ستاروں کے گرنے کی (١)

(ف 1) نجوم سے مراد یہاں حصص قرآن ہیں اور مواقع تعبیر ہے۔ قسم سے اس چیز کو بطور استشہاد اور استدلال کے پیش فرمایا ہے اور کہا ہے ، کہ یہ بہت بڑی گواہی ہے ۔ یعنی تم لوگ اگر اس حقیقت پر غور کرو کہ کیونکر قرآن نے آہستہ آہستہ دلوں میں اپنی جگہ بنالی ہے اور کیونکر اس کو قبول عام کی نعمت میسر ہوئی ہے ۔ حالانکہ اس کی شدید مخالفت کی گئی اور سخت ترین عداوت اور بغض کا اظہار کیا گیا تو تمہیں معلوم ہوجائے کہ محض اس لئے کہ یہ قرآن وصف کرم سے متصف ہے ۔ بنی نوع انسان کے لئے مفید ہے اور باعث برکت وسعادت ہے ۔