وَيَعْبُدُونَ مِن دُونِ اللَّهِ مَا لَا يَنفَعُهُمْ وَلَا يَضُرُّهُمْ ۗ وَكَانَ الْكَافِرُ عَلَىٰ رَبِّهِ ظَهِيرًا
یہ اللہ کو چھوڑ کر ان کی عبادت کرتے ہیں جو نہ تو انھیں کوئی نفع دے سکیں نہ کوئی نقصان پہنچا سکیں، اور کافر تو ہے ہی اپنے رب کے خلاف (شیطان کی) مدد کرنے والا۔
شرک اللہ کا کھلا انکار ہے ! (ف 1) اللہ کے مختلف انعامات آپ دیکھ چکے اور آپ کو معلوم ہوگیا کہ ہر قسم اور ہر نوع کی قدرتیں اس کے ساتھ مختص ہیں وہی کائنات کا مالک ہے اور اسی کی ذات بابرکات کو ہر طرح کے اختیارات حاصل ہیں ۔ مگر مشرکوں کی بےوقوفی اور کم عقلی ملاحظہ ہو کہ باوجود ایک قادر و عظیم خدا کے یہ ایسی چیزوں کی پوجا اور عبادت میں مصروف ہیں ۔ جو ان کو نہ تو کوئی نفع پہنچا سکتی ہیں اور نہ نقصان ۔ ارشاد ہے کہ یہ شرک اللہ تعالیٰ کا کھلا انکار ہے اور کھلی بغاوت ہے۔ حل لغات: ظَهِيرًا ۔ اصل معنی مددگار اور معاون کے ہیں ۔ مگر جب صلہ علی ہو تو اس کے معنی مخالف اور دشمن کے ہوجاتے ہیں ۔