سورة التحريم

يَا أَيُّهَا الَّذِينَ كَفَرُوا لَا تَعْتَذِرُوا الْيَوْمَ ۖ إِنَّمَا تُجْزَوْنَ مَا كُنتُمْ تَعْمَلُونَ

اے کافرو! آج تم عذر و بہانہ مت کرو۔ تمہیں صرف تمہارے کرتوت کا بدلہ دیا جا رہا ہے۔

یعنی قیامت کے روز ان الفاظ میں جہنمیوں کو زجر وتوبیخ کی جائے گی ،پس ان سے کہا جائے گا :﴿یٰٓاَیُّہَا الَّذِیْنَ کَفَرُوْا لَا تَعْتَذِرُوا الْیَوْمَ ﴾ ”اے کافرو!آج عذر مت پیش کرو۔“ یعنی عذر پیش کرنے کا وقت چلا گیا اور اس کا فائدہ ختم ہوگیا ، اب تو اعمال کی جزا وسزا کے سوا کچھ باقی نہیں اور تم نے اللہ تعالیٰ کے انکار، اس کی آیات کی تکذیب اور اس کے رسولوں اور اولیا ءکے ساتھ جنگ کے سوا کچھ آگے نہیں بھیجا۔