سورة الاعراف - آیت 173

أَوْ تَقُولُوا إِنَّمَا أَشْرَكَ آبَاؤُنَا مِن قَبْلُ وَكُنَّا ذُرِّيَّةً مِّن بَعْدِهِمْ ۖ أَفَتُهْلِكُنَا بِمَا فَعَلَ الْمُبْطِلُونَ

ترجمہ جوناگڑھی - محمد جونا گڑھی

یا یوں کہو کہ پہلے پہلے شرک تو ہمارے بڑوں نے کیا اور ہم ان کے بعد ان کی نسل میں ہوئے سو کیا ان غلط راہ والوں کے فعل پر تو ہم کو ہلاکت میں ڈال دے گا ؟ (١)۔

تفسیر اشرف الہواشی - محمد عبدہ لفلاح

ف 2 یا یہ عذار پیش کرو کہ ہم تو اپنے بڑوں کی دیکھا دیکھی شرک کی راہ پر چلتے رہے ہیں ہمارا قصور کیا ہے۔ مطلب یہ ہے کہ شرک کے بارے میں مقلد کا کوئی عذر قبول نہ ہوگا، ( ابن کثیر۔ کبیر) ف 3 یعنی ہمارے آباؤ اجدادنے لہٰذا وہی مجرم ہیں مطلب یہ ہے کہ اس قسم کے عذر كا وہاں کوئی موقع نہ ہوگا کیونکہ ابتدا ءًہر شخص سے توحید پر قائم رہنے کا عہد لیا گیا ہے اور پھر اس عہد کی یاددہانی اور تفسیر و تشریح کے لیے رسول بھیجے اور كتابیں نازل فرمائی گئی ہیں۔( کذافی التفاسیر )