سورة القلم

هَمَّازٍ مَّشَّاءٍ بِنَمِيمٍ

طعنے دیتا ہے، چغلیاں کھاتا پھرتا ہے۔

هَمَّازٍ مَّشَّآءٍۭ بِنَمِيْمٍ: ’’ هَمَّازٍ‘‘ ’’هَمَزَ يَهْمُزُ هَمْزًا‘‘ (ن) سے مبالغے کا صیغہ ہے، بہت طعنہ دینے والا، عیب لگانے والا۔ ’’ مَشَّآءٍ‘‘ ’’مَشٰي يَمْشِيْ مَشْيًا‘‘ ( ض) (چلنا) سے مبالغے کاصیغہ ہے، بہت چلنے والا، بہت دوڑ دھوپ کرنے والا۔ ’’نَمِيْمٌ‘‘ چغلی، خرابی ڈالنے کی نیت سے کسی کی بات دوسرے شخص تک پہنچانا۔ ان دونوں صفتوں کا خلاصہ دوسروں پر عیب لگانا ہے۔ ’’ هَمَّازٍ ‘‘ وہ جو دوسرے کے منہ پر عیب لگاتا اور طعنہ دیتا ہے۔ ’’ مَشَّآءٍ بِنَمِيْمٍ ‘‘ وہ جو پیٹھ پیچھے چغلی کرتا ہے۔ یعنی بس چلے تو جرأت سے منہ پر طعنہ زنی اور عیب جوئی کرتا ہے اور بس نہ چلے تو پیٹھ پیچھے دوڑ دھوپ جاری رکھتا ہے۔