سورة غافر - آیت 79

اللَّهُ الَّذِي جَعَلَ لَكُمُ الْأَنْعَامَ لِتَرْكَبُوا مِنْهَا وَمِنْهَا تَأْكُلُونَ

ترجمہ فہم القرآن - میاں محمد جمیل

اللہ ہی نے تمہارے لیے چوپائے بنائے ہیں تاکہ ان میں سے کسی پر سواری کرو اور کسی کا گوشت کھاؤ

تفسیر تیسیر الرحمن لبیان القرآن - محمد لقمان سلفی صاحب

(٤٣) آیات (٦١، ٦٢، ٦٣، ٦٤) کی طرح یہاں بھی اللہ تعالیٰ نے اپنے بندوں کے لئے اپنی بعض نعمتوں کا ذکر کر کے انہیں دعوت فکر و نظر دی ہے، تاکہ وہ اپنے خلاق و رازق کو پہچانیں، اس پر ایمان لائیں اور صرفا سی کی عبادت کریں، فرمایا کہ اللہ نے ہی تمہارے لئے چوپائے پیدا کئے ہیں، جن میں بعض پر تم سوار ہوتے ہو، یعنی اونٹ اور بعض کے گوشت کھاتے ہوجیسے گائے، بکری اور بھیڑ، اور ان میں دوسرے فوائد و منافع بھی ہیں، ینی ان سے اون، بال اور چمڑا حاصل کرتے ہو اونٹ میں ایک بڑا فائدہ یہ بھی ہے کہ ان پر اپنا سامان تجارت لاد کر ایک شہر سے دوسرے شہر جاتے ہو اور اس کے ذریعہ اپنا بری راستہ طے کرتے ہو اور کشتی کے ذریعہ بحری راستہ یہ سب اللہ کی نوع بہ نوع نشانیاں ہیں جو اس کے کمال قدرت اور بندوں کے لئے اس کی عظیم رحمت پر دلالت کرتی ہیں۔