سورة الأحزاب - آیت 16

قُل لَّن يَنفَعَكُمُ الْفِرَارُ إِن فَرَرْتُم مِّنَ الْمَوْتِ أَوِ الْقَتْلِ وَإِذًا لَّا تُمَتَّعُونَ إِلَّا قَلِيلًا

ترجمہ فہم القرآن - میاں محمد جمیل

اے نبی ان سے فرماؤ اگر تم موت یا قتل سے بھاگنا چاہو تو تمہیں کوئی فائدہ نہیں ہوگا اس کے بعد زندگی کا فائدہ اٹھانے کا تھوڑا ہی موقع تمہیں مل سکے گا۔

تفسیرتیسیرارحمٰن - محمد لقمان سلفی

(13) اللہ تعالیٰ نے نبی کریم (ﷺ) کی زبانی ان کے نفاق اور ان کی بزدلی کا یہ جواب دیا کہ اگر تمہاری قسمت میں قتل ہونا لکھا ہوگا اور تمہاری موت کا وقت آچکے تو راہ فرار اختیار کرنے سے تم بچ نہیں جاؤ گے اور اگر تمہاری عمر کا کچھ حصہ باقی ہوگا تو وہ جلد ہی گذر جائے گا اور تم دنیا کی لذتوں سے بہت تھوڑا فائدہ اٹھا سکو گے اور بالاخر موت تمہیں آدبوچے گی۔