سورة الحديد - آیت 9

هُوَ الَّذِي يُنَزِّلُ عَلَىٰ عَبْدِهِ آيَاتٍ بَيِّنَاتٍ لِّيُخْرِجَكُم مِّنَ الظُّلُمَاتِ إِلَى النُّورِ ۚ وَإِنَّ اللَّهَ بِكُمْ لَرَءُوفٌ رَّحِيمٌ

ترجمہ فہم القرآن - میاں محمد جمیل

وہی اللہ ہے جو اپنے بندے (محمد) پر واضح آیات نازل کرتا ہے تاکہ تمہیں اندھیروں سے نکال کر روشنی میں لے آئے، اور حقیقت یہ ہے کہ اللہ تم پر بہت شفقت کرنے والا اور بڑا رحم فرمانے والاہے

تسہیل البیان فی تفسیر القرآن - ام عمران شکیلہ بنت میاں فضل حسین

آیات بینات سے مراد قرآن کی آیات بھی ہو سکتی ہیں اور صدقات کے نشانات بھی، یعنی کیسے کیسے نازک مرحلوں پر اللہ تعالیٰ نے غیبی اسباب و وسائل سے اپنے رسول اللہ صلی اللہ علیہ وسلم کی مدد فرمائی جن سے واضح طور پر معلوم ہو سکتا ہے کہ رسول اللہ صلی اللہ علیہ وسلم کی پشت پر کوئی زبردست مافوق الفطرت طاقت موجود ہے اور یہ سب کچھ اس لیے ہے کہ تمہیں جہالت اور کفر وشرک کی تاریکیوں سے نکال کر علم و عرفان کی روشنی میں لے آئے، اگر تم سمجھو تو یہ اللہ کی تم پر بہت بڑی مہربانی اور احسان ہے۔