سورة الطور

فَلْيَأْتُوا بِحَدِيثٍ مِّثْلِهِ إِن كَانُوا صَادِقِينَ

اگر یہ سچے ہیں تو اس جیسا کلام بنا لائیں

یعنی اگر یہ اپنے اس دعوئے میں سچے ہیں کہ یہ قرآن محمد صلی اللہ علیہ وسلم کا گھڑا ہوا ہے۔ تو پھر یہ بھی اس جیسی کتاب بنا کر پیش کر دیں۔ جو نظم، اعجاز و بلاغت، حسن بیان ندرتِ اسلوب، تعیین حقائق اور حل مسائل میں اس کا مقابلہ کر سکے۔ یہ کفار قریش تو کیا اگر ان کے ساتھ روئے زمین کے جنات و انسان مل جائیں جب بھی اس قرآن کی نظیر لانے سے وہ سب عاجز رہیں گے اور پورا قرآن تو بڑی چیز ہے اس جیسی دس سورتیں بلکہ ایک سورت بھی قیامت تک نہیں بنا کے لا سکتے۔