سورة آل عمران - آیت 169

وَلَا تَحْسَبَنَّ الَّذِينَ قُتِلُوا فِي سَبِيلِ اللَّهِ أَمْوَاتًا ۚ بَلْ أَحْيَاءٌ عِندَ رَبِّهِمْ يُرْزَقُونَ

ترجمہ فہم القرآن - میاں محمد جمیل

جو لوگ اللہ کی راہ میں شہید کئے گئے ہیں انہیں مردہ نہ سمجھو۔ وہ تو زندہ ہیں اور اپنے رب کے پاس رزق دیے جاتے ہیں

تسہیل البیان فی تفسیر القرآن - ام عمران شکیلہ بنت میاں فضل حسین

شہدا کی فضیلت یہ ہے کہ وہ عالم دنیا سے رخصت ہوتے ہی فوراً جنت میں پہنچ جاتے ہیں عالم برزخ یعنی موت والا تیسرا دور ان پر نہیں آتا۔ شہدا کی یہ زندگی حقیقی ہے لیکن اس کا شعور اہل دنیا کو نہیں جیسا کہ رب تعالیٰ کا ارشاد ہے: ﴿وَ لَا تَقُوْلُوْا لِمَنْ يُّقْتَلُ فِيْ سَبِيْلِ اللّٰهِ اَمْوَاتٌ﴾ (البقرہ: ۱۵۴) ’’اللہ کی راہ میں مارے جانے والوں کو مردہ نہ سمجھو۔‘‘ سیدنا عبداللہ بن مسعود رضی اللہ عنہما سے روایت ہے کہ ہم نے اس آیت کے بارے میں رسول اللہ سے پوچھا تو آپ نے فرمایا کہ شہداء کی رو حیں سبز پرندوں کی صورت میں ہونگی ان کے لیے عرش الٰہی میں کچھ قندیلیں لٹکی ہیں یہ روحیں جنت میں جہاں چاہیں سیر کرتی پھرتی ہیں۔ پھر ان قندیلوں میں واپس آجاتی ہیں۔ ان کے پروردگار نے ان کی طرف دیکھا اور پوچھا کیا تمہیں کسی چیز کی خواہش ہے؟ تو انھوں نے کہا! ہم کس چیز کی خواہش کریں ہم جہاں چاہیں سیر کرتی پھرتی ہیں، پروردگار نے تین بار ان سے یہی سوال کیا، جب انھوں نے دیکھا کہ اب جواب دیے بغیر کوئی چارہ نہیں تو کہا اے پروردگار ہم چاہتے ہیں کہ تو ہماری روحیں واپس (دنیا میں)لوٹا دے تاکہ ہم تیری راہ میں پھر جہاد کریں اور پھر شہید ہوں۔ (مسلم: ۱۸۸۷)