سورة آل عمران - آیت 160

إِن يَنصُرْكُمُ اللَّهُ فَلَا غَالِبَ لَكُمْ ۖ وَإِن يَخْذُلْكُمْ فَمَن ذَا الَّذِي يَنصُرُكُم مِّن بَعْدِهِ ۗ وَعَلَى اللَّهِ فَلْيَتَوَكَّلِ الْمُؤْمِنُونَ

ترجمہ فہم القرآن - میاں محمد جمیل

اگر اللہ تمہاری مدد فرمائے تو تم پر کوئی غالب نہیں آسکتا اور اگر وہ تمہیں چھوڑ دے تو اس کے بعد کون ہے جو تمہاری مدد کرے گا؟ ایمان والوں کو اللہ تعالیٰ پر ہی بھروسہ رکھنا چاہیے

تسہیل البیان فی تفسیر القرآن - ام عمران شکیلہ بنت میاں فضل حسین

جنگ اُحد کے دوران جو لوگ مورچہ چھوڑکر مال غنیمت سمیٹنے دوڑپڑے تھے جس کی وجہ سے انھوں نے رسول اللہ صلی اللہ علیہ وسلم کی نافرمانی بھی کی اس آیت میں یہ بتایا جارہا ہے کہ بھروسہ تو صرف اس پر کیا جاسکتا ہے جو سب سے زیادہ طاقت ور اور سب اسباب پر غالب و حاکم ہو اور ایسی ذات صرف ایک اللہ ہی کی ہے لہٰذا وہی بھروسہ کے قابل ہے۔