قُلْ إِنَّمَا أَنَا بَشَرٌ مِّثْلُكُمْ يُوحَىٰ إِلَيَّ أَنَّمَا إِلَٰهُكُمْ إِلَٰهٌ وَاحِدٌ فَاسْتَقِيمُوا إِلَيْهِ وَاسْتَغْفِرُوهُ ۗ وَوَيْلٌ لِّلْمُشْرِكِينَ
اے نبی ان سے فرمائیں میں تمہارے جیسا بشر ہوں مجھے وحی کے ذریعہ سے بتایا گیا ہے کہ تمہارا الٰہ ایک ہی الٰہ ہے لہٰذا تم اسی کی طرف اپنا رخ کرو اور اس سے معافی مانگو، مشرکوں کے لیے تباہی ہے۔
اللہ تعالیٰ اپنے پیغمبر کو حکم دے رہا ہے کہ آپ ان مشرکوں کے سامنے اعلان کر دیجیے کہ میں بھی تمہاری طرح کا ایک انسان ہی ہوں مجھے بذریعہ وحی حکم دیا گیا ہے کہ تم سب کا معبود ایک اکیلا اللہ تعالیٰ ہی ہے۔ اور اس وحی کا تقاضا یہ ہے کہ اللہ تعالیٰ کے سوا دوسروں میں خدائی اختیارات و تصرفات کو تسلیم کرنا چھوڑدو اور اپنے ذہن کو ایسے مشرکانہ عقائد سے پاک صاف کر کے اپنی امیدیں ایک اللہ کے ساتھ وابستہ کر دو۔ فریاد کے لیے پکارو تو اسی کو پکارو۔ اور پہلے جو غلط روش تم نے اختیار کر رکھی تھی اس کے لیے معافی مانگو۔ یقین کرو کہ اللہ کے ساتھ دوسروں کو بھی پکارنے والوں کا انجام تباہی کے سوا کچھ نہیں۔