سورة فاطر - آیت 4

وَإِن يُكَذِّبُوكَ فَقَدْ كُذِّبَتْ رُسُلٌ مِّن قَبْلِكَ ۚ وَإِلَى اللَّهِ تُرْجَعُ الْأُمُورُ

ترجمہ فہم القرآن - میاں محمد جمیل

اے نبی اگر یہ لوگ تمہیں جھٹلاتے ہیں تو یہ کوئی نئی بات نہیں تجھ سے پہلے بھی بہت سے رسول جھٹلائے جا چکے ہیں اور سارے معاملات اللہ ہی کی طرف لوٹائے جاتے ہیں

تسہیل البیان فی تفسیر القرآن - ام عمران شکیلہ بنت میاں فضل حسین

مایوسی کی ممانعت: اے نبی! اگر آپ صلی اللہ علیہ وسلم کے زمانے کے کفار آپ صلی اللہ علیہ وسلم کی مخالفت کریں اور آپ صلی اللہ علیہ وسلم کی بتائی ہوئی توحید اور آپ صلی اللہ علیہ وسلم کی سچی رسالت کو جھٹلائیں تو آپ صلی اللہ علیہ وسلم شکستہ دل نہ ہو جایا کریں۔ اگلے نبیوں کے ساتھ بھی یہی ہوتا رہا ہے۔ اور کسی بھی بات کا فیصلہ اور انجام ان لوگوں کے ہاتھ میں نہیں بلکہ سب کاموں کا فیصلہ اور انجام اللہ کے ہاتھ میں ہے لہٰذا اطمینان رکھیے اور اللہ پر توکل کیجیے۔ (ابن کثیر)