سورة سبأ - آیت 26

قُلْ يَجْمَعُ بَيْنَنَا رَبُّنَا ثُمَّ يَفْتَحُ بَيْنَنَا بِالْحَقِّ وَهُوَ الْفَتَّاحُ الْعَلِيمُ

ترجمہ فہم القرآن - میاں محمد جمیل

فرما دیں کہ ہمارا رب ہم کو جمع کرے گا پھر ہمارے درمیان ٹھیک ٹھیک فیصلہ فرمائے گا وہ ایسا زبردست حاکم ہے جو سب کچھ جانتا ہے۔

تسہیل البیان فی تفسیر القرآن - ام عمران شکیلہ بنت میاں فضل حسین

اللہ تعالیٰ تمام عالم کو میدان قیامت میں اکٹھا کر کے سچے فیصلے کر دے گا اس دن تمہیں تمہاری حقانیت و صداقت معلوم ہو جائے گی ارشاد باری تعالیٰ ہے: ﴿وَ يَوْمَ تَقُوْمُ السَّاعَةُ يَوْمَىِٕذٍ يَّتَفَرَّقُوْنَ﴾ (الروم: ۱۴) ’’قیامت کے دن سب جدا جدا ہو جائیں گے۔‘‘ نیکوں کو ان کی جزا اور بدوں کو ان کی سزا دے گا۔ ایمان دار جنت کے باغوں میں خوش ہوں گے اور ہماری آیتوں اور آخرت کے دن کو جھٹلانے والے اور کفر کرنے والے، دوزخ کے گڑھوں میں حیران و پریشان ہوں گے۔ وہ حاکم و عادل ہے۔ حقیقت حال کا پورا عالم ہے۔ (ابن کثیر)