سورة الحج - آیت 64

لَّهُ مَا فِي السَّمَاوَاتِ وَمَا فِي الْأَرْضِ ۗ وَإِنَّ اللَّهَ لَهُوَ الْغَنِيُّ الْحَمِيدُ

ترجمہ فہم القرآن - میاں محمد جمیل

اسی کا ہے جو کچھ آسمانوں میں ہے اور جو کچھ زمین میں ہے بے شک وہ خزانوں کا مالک اور تعریف کے لائق ہے۔“ (٦٤)

تسہیل البیان فی تفسیر القرآن - ام عمران شکیلہ بنت میاں فضل حسین

چونکہ اللہ تعالیٰ ہی ہر چیز کا خالق ومالک ہے لہٰذا ہر چیز اپنی ہستی اور بقا کے لیے اللہ تعالیٰ کی محتاج ہوئی۔ جبکہ وہ خود کسی کا محتاج نہیں۔ تمام کائنات کے وجود سے پہلے بھی اس کی ہستی قائم ودائم تھی اور وجود کے بعد بھی وہ اس سے بےنیاز ہے۔ وہ کسی کا محتاج نہیں کیونکہ وہ غنی ہے۔ لہٰذا کوئی اس کی حمد وثنا بیان کرے یا نہ کرے اس سے اللہ تعالیٰ کو کچھ فرق نہیں پڑتا کیونکہ وہ اپنی ذات میں خود ہی محمود ہے۔ البتہ اللہ کی حمد وثنا بیان کرنے والے کی اپنی ذات کو ضرور فائدہ پہنچ جاتا ہے۔