سورة ھود - آیت 66

فَلَمَّا جَاءَ أَمْرُنَا نَجَّيْنَا صَالِحًا وَالَّذِينَ آمَنُوا مَعَهُ بِرَحْمَةٍ مِّنَّا وَمِنْ خِزْيِ يَوْمِئِذٍ ۗ إِنَّ رَبَّكَ هُوَ الْقَوِيُّ الْعَزِيزُ

ترجمہ فہم القرآن - میاں محمد جمیل

” پھر جب ہمارا حکم آگیا تو ہم نے صالح کو اور ان لوگوں کو جو اس کے ساتھ ایمان لائے تھے اپنی رحمت کے ساتھ بچا لیا اور اس دن کی رسوائی سے بھی۔ بے شک تیرا رب بڑی قوت والا اور سب پر غالب ہے۔“ (٦٦) ”

تسہیل البیان فی تفسیر القرآن - ام عمران شکیلہ بنت میاں فضل حسین

صالح علیہ السلام کی ہجرت: عذاب نازل ہونے سے پیشتر ہی صالح علیہ السلام اور ان پر ایمان لانے والوں کو حکم الٰہی ہوا۔ چنانچہ آپ علیہ السلام اپنے ساتھیوں کو لے کر فلسطین کی طرف روانہ ہو گئے۔ اور سب لوگ اس ذلت کے عذاب سے بچ گئے جو مجرم قوم پر نازل ہونے والا تھا۔