كَدَأْبِ آلِ فِرْعَوْنَ ۙ وَالَّذِينَ مِن قَبْلِهِمْ ۚ كَذَّبُوا بِآيَاتِ رَبِّهِمْ فَأَهْلَكْنَاهُم بِذُنُوبِهِمْ وَأَغْرَقْنَا آلَ فِرْعَوْنَ ۚ وَكُلٌّ كَانُوا ظَالِمِينَ
” جیسے فرعون کی قوم اور ان سے پہلے لوگوں کا حال تھا۔ انہوں نے اپنے رب کی آیات کو جھٹلایا تو ہم نے انہیں ان کے گناہوں کی وجہ سے ہلاک کردیا اور ہم نے فرعون کی قوم کو غرق کیا اور وہ سب ظالم تھے۔“ (٥٤)
یعنی ان کفار مکہ سے پہلے ہم نے آل فرعون اور دوسری اقوام پر انعامات کی بارش کی تھی۔ لیکن انھوں نے انعامات کی ناقدری کی۔ ان کی نیتوں میں بھی فتور آگیا، اللہ کی فرمانبرداری اور شکرادا کرنے کی بجائے وہ اس کی نافرمانی اور سرکشی پر اتر آئے تھے، لہٰذا ہم نے انھیں تباہ و برباد کر ڈالا اور آل فرعون کو تو ڈبوہی ڈالا اور اسکا نام و نشان تک ختم کر ڈالا۔ یہ سب ظالم تھے، اللہ نے ان پر کوئی ظلم نہیں کیا۔