سورة الاعراف - آیت 100

أَوَلَمْ يَهْدِ لِلَّذِينَ يَرِثُونَ الْأَرْضَ مِن بَعْدِ أَهْلِهَا أَن لَّوْ نَشَاءُ أَصَبْنَاهُم بِذُنُوبِهِمْ ۚ وَنَطْبَعُ عَلَىٰ قُلُوبِهِمْ فَهُمْ لَا يَسْمَعُونَ

ترجمہ فہم القرآن - میاں محمد جمیل

” اور کیا وہ لوگ جو زمین کے وارث بنے اس کے رہنے والوں کے بعد ان کی رہنمائی اس بات نے نہیں کی کہ اگر ہم چاہیں تو ان کے گناہوں کی وجہ سے انہیں سزا دیں اور ہم ان کے دلوں پر مہر کردیتے ہیں وہ نہیں سنتے۔ (١٠٠)

تسہیل البیان فی تفسیر القرآن - ام عمران شکیلہ بنت میاں فضل حسین

یعنی ایک تباہ و برباد ہونے والی قوم کی جگہ دوسری قوم لے لیتی ہے تواسکی راہنمائی کے لیے اپنی پیش رو قوم کے زوال کے کافی اسباب موجود ہوتے ہیں ۔ اور اگر وہ عقل سے کا م لے تو سمجھ سکتی ہے کہ کچھ مدت پہلے جولوگ یہاں دادعیش دے رہے تھے اور جنکی عظمت کا جھنڈا لہرارہا تھا لیکن آج وہ ہلاک ہوئے پڑے ہیں۔ تو اللہ تعالیٰ فرماتے ہیں جس طرح گزشتہ قوموں کوان کے گناہوں کی پاداش میں ہلاک کیا، ہم چاہیں تو تمہیں بھی تمہارے کر توتوں کی وجہ سے ہلاک کر دیں ۔ دلوں پر مہر کالگنا ؟ مسلسل گناہوں کی وجہ سے دلوں پر مہر لگ جاتی ہے جسکا نتیجہ یہ ہو تا ہے کہ حق کی آواز کے لیے ان کے کان بند ہوجا تے ہیں پھر انذار یعنی ڈرانا، اور و عظ و نصیحت ان کے لیے بیکار ہوجاتے ہیں پھر انھیں کو ئی کچھ نہیں سنا سکتا ۔