سورة الجمعة - آیت 9

يَا أَيُّهَا الَّذِينَ آمَنُوا إِذَا نُودِيَ لِلصَّلَاةِ مِن يَوْمِ الْجُمُعَةِ فَاسْعَوْا إِلَىٰ ذِكْرِ اللَّهِ وَذَرُوا الْبَيْعَ ۚ ذَٰلِكُمْ خَيْرٌ لَّكُمْ إِن كُنتُمْ تَعْلَمُونَ

ترجمہ فہم القرآن - میاں محمد جمیل

اے ایمان والو! جب تمہیں جمعہ کے دن نماز کے لیے پکارا جائے تو اللہ کے ذکر کی طرف دوڑو اور خریدو فروخت چھوڑدو، اگر تم جانتے ہو تو یہ تمہارے لیے زیادہ بہتر ہے

تفسیر ثنائی - ثنا اللہ امرتسری

اے ایمان والو ! جو لوگ اللہ کی مرضی حاصل کرنے کی پرواہ نہیں کرتے تم بھی ان کی پرواہ نہ کرو بس تم ان کو چھوڑ دو اور اللہ کی رضا جوئی کی فکر کیا کرو دیکھو ایک خاص کام رضا جوئی کا تم کو بتاتے ہیں اس کی تعمیل کیا کرو۔ پس سنو ! جمعہ کے روز دوپہر کے وقت جب نماز کے لئے اذان دی جائے یعنی بذریعہ اذان تم کو بلایا جائے تو تم بلا تکلف اور بلا تاخر اللہ کے ذکر خطبہ اور نماز کی طرف چلا کرو اور سودا سلف اور دیگر کاروبار چھوڑ دیا کرو دنیاوی طمع نہ کیا کرو یہ تمہارے لئے بہتر ہے اگر تم اللہ احکام کی حکمت جانتے ہو یعنی اگر تمہیں اس بات کا یقین ہے کہ اللہ تعالیٰ جس کام کا حکم دیتا ہے اس میں اگر نقصان ہو تو اس کی تلافی کردیتا ہے پس تم اس یقین کے ساتھ حکم الٰہی کی تعمیل کرو