سورة فصلت - آیت 9

قُلْ أَئِنَّكُمْ لَتَكْفُرُونَ بِالَّذِي خَلَقَ الْأَرْضَ فِي يَوْمَيْنِ وَتَجْعَلُونَ لَهُ أَندَادًا ۚ ذَٰلِكَ رَبُّ الْعَالَمِينَ

ترجمہ فہم القرآن - میاں محمد جمیل

اے نبی ان سے کہو کیا تم اس اللہ کا انکار کرتے ہو اور دوسروں کو اس کا ہمسر ٹھہراتے ہو جس نے زمین کو دو دنوں میں بنایا، وہی تو پوری کائنات کا رب ہے

ابن کثیر - حافظ عماد الدین ابوالفداء ابن کثیر صاحب

تخلیق کائنات کا مرحلہ وار ذکر ہر چیز کا خالق ہرچیز کا مالک ہرچیز پر حاکم ہرچیز پر قادر صرف اللہ ہے ۔ پس عبادتیں بھی صرف اسی کی کرنی چاہئیں ۔ اس نے زمین جیسی وسیع مخلوق کو اپنی کمال قدرت سے صرف دو دن میں پیدا کر دیا ہے ۔ تمہیں نہ اس کے ساتھ کفر کرنا چاہے نہ شرک ۔ جس طرح سب کا پیدا کرنے والا وہی ایک ہے ۔ ٹھیک اسی طرح سب کا پالنے والا بھی وہی ایک ہے ۔ یہ تفصیل یاد رہے کہ اور آیتوں «إِنَّ رَبَّکُمُ اللہُ الَّذِی خَلَقَ السَّمَاوَاتِ وَالْأَرْضَ فِی سِتَّۃِ أَیَّامٍ » ۱؎ (7-الأعراف:54) میں زمین و آسمان کا چھ دن میں پیدا کرنا بیان ہوا ہے ۔ اور یہاں اس کی پیدائش کا وقت الگ بیان ہو رہا ہے ۔ پس معلوم ہوا کہ پہلے زمین بنائی گئی ۔ عمارت کا قاعدہ یہی ہے کہ پہلے بنیادیں اور نیچے کا حصہ تیار کیا جاتا ہے پھر اوپر کا حصہ اور چھت بنائی جاتی ہے ۔ چنانچہ کلام اللہ شریف کی ایک اور آیت میں ہے«ہُوَ الَّذِی خَلَقَ لَکُم مَّا فِی الْأَرْضِ جَمِیعًا ثُمَّ اسْتَوَیٰ إِلَی السَّمَاءِ فَسَوَّاہُنَّ سَبْعَ سَمَاوَاتٍ» ۱؎ (2-البقرۃ:29) ’ اللہ وہ ہے جس نے تمہارے لیے زمین میں جو کچھ ہے پیدا کر کے پھر آسمانوں کی طرف توجہ فرمائی اور انہیں ٹھیک سات آسمان بنا دیئے ‘ ۔ ہاں سورۃ النازعات میں « أَأَنتُمْ أَشَدٰ خَلْقًا أَمِ السَّمَاءُ بَنَاہَا رَفَعَ سَمْکَہَا فَسَوَّاہَا وَأَغْطَشَ لَیْلَہَا وَأَخْرَجَ ضُحَاہَا وَالْأَرْضَ بَعْدَ ذٰلِکَ دَحَاہَا أَخْرَجَ مِنْہَا مَاءَہَا وَمَرْعَاہَا وَالْجِبَالَ أَرْسَاہَا مَتَاعًا لَّکُمْ وَلِأَنْعَامِکُمْ » ۱؎ (79-النازعات:27-33) ہے پہلے آسمان کی پیدائش کا ذکر ہے پھر فرمایا ہے کہ زمین کو اس کے بعد بچھایا ۔ اس سے مراد زمین میں سے پانی چارہ نکالنا اور پہاڑوں کا گاڑنا ہے جیسے کہ اس کے بعد کا بیان ہے ۔ یعنی پیدا پہلے زمین کی گئی پھر آسمان پھر زمین کو ٹھیک ٹھاک کیا ۔ لہٰذا دونوں آیتوں میں کوئی فرق نہیں ۔ صحیح بخاری شریف میں ہے کہ { ایک شخص نے عبداللہ بن عباس سے پوچھا کی بعض آیتوں میں مجھے کچھ اختلاف سا نظر آتا ہے چنانچہ ایک آیت میں ہے «فَلَآ اَنْسَابَ بَیْنَہُمْ یَوْمَیِٕذٍ وَّلَا یَتَسَاءَلُوْنَ» ۱؎ (23-المؤمنون:101) یعنی ’ قیامت کے دن آپس کے نسب نہ ہوں گے اور نہ ایک دوسرے سے سوال کرے گا ‘ ۔ دوسری آیت میں ہے «وَاَقْبَلَ بَعْضُہُمْ عَلٰی بَعْضٍ یَّتَسَاءَلُوْنَ» ۱؎ (37-الصافات:27) یعنی ’ بعض آپس میں ایک دوسرے کی طرف متوجہ ہو کر پوچھ گچھ کریں گے ‘ ۔ ایک آیت میں ہے «وَلَا یَکْتُمُوْنَ اللّٰہَ حَدِیْثًا» ۱؎ (4-النسآء:42) یعنی ’ اللہ سے کوئی بات چھپائیں گے نہیں ‘ } ۔ { دوسری آیت میں ہے کہ مشرکین کہیں گے «وَاللّٰہِ رَبِّنَا مَا کُنَّا مُشْرِکِیْنَ» ۱؎ (6-الأنعام:23) ’ اللہ کی قسم ہم نے شرک نہیں کیا ‘ ۔ ایک آیت میں ہے زمین کو آسمان کے بعد بچھایا «وَالْاَرْضَ بَعْدَ ذٰلِکَ دَحٰیہَا» ۱؎ (79-النازعات:30) دوسری آیت «قُلْ اَؤُنَبِّئُکُمْ بِخَیْرٍ مِّنْ ذٰلِکُمْ» ۱؎ (3-آل عمران:15) ، میں پہلے زمین کی پیدائش پھر آسمان کی پیدائش کا ذکر ہے ۔ ایک تو ان آیتوں کا صحیح مطلب بتائے جس سے اختلاف اٹھ جائے ۔ دوسرے یہ جو فرمایا ہے «وَکَانَ اللَّہ غَفُورًا رَحِیمًا » ۱؎ (4-النساء:96) ، « عَزِیزًا حَکِیمًا » ۱؎ (4-النساء:56) ، « سَمِیعًا بَصِیرًا » ۱؎ (4-النساء:58) تو کیا یہ مطلب ہے کہ اللہ ایسا تھا ؟ اس کے جواب میں آپ رضی اللہ عنہ نے فرمایا کہ ” جن دو آیتوں میں سے ایک میں آپس کا سوال جواب ہے اور ایک میں ان کا انکار ہے ۔ یہ دو وقت ہیں صور میں دو نفخے پھونکے جائیں گے ایک کے بعد آپس کی پوچھ گچھ کچھ نہ ہو گی ایک کے بعد آپس میں ایک دوسرے سے سوالات ہوں گے ۔ جن دو دوسری آیتوں میں ایک میں بات کے نہ چھپانے کا اور ایک میں چھپانے کا ذکر ہے یہ بھی دو موقعے ہیں جب مشرکین دیکھیں گے کہ موحدوں کے گناہ بخش دیئے گئے تو کہنے لگے کہ ہم مشرک نہ تھے ۔ لیکن جب منہ پر مہر لگ جائیں گی اور اعضاء بدن گواہی دینے لگیں گے تو اب کچھ بھی نہ چھپے گا ۔ اور خود اپنے کرتوت کے اقراری ہو جائیں گے اور کہنے لگیں گے کاش کے ہم زمین کے برابر کر دیئے جاتے ۔ آسمان و زمین کی پیدائش کی ترتیب بیان میں بھی دراصل کچھ اختلاف نہیں پہلے دو دن میں زمین بنائی گئی پھر آسمان کو دو دن میں بنایا گیا پھر زمین کی چیزیں پانی ، چارہ ، پہاڑ ، کنکر ، ریت ، جمادات ، ٹیلے وغیرہ دو دن میں پیدا کئے یہی معنی لفظ «دَحَاھَا» کے ہیں ۔ پس زمین کی پوری پیدائش چار دن میں ہوئی ۔ اور دو دن میں آسمان ۔ اور جو نام اللہ تعالیٰ نے اپنے لیے مقرر کئے ہیں ان کا بیان فرمایا ہے وہ ہمیشہ ایسا ہی رہے گا ۔ اللہ کا کوئی ارادہ پورا ہوئے بغیر نہیں رہتا ۔ پس قرآن میں ہرگز اختلاف نہیں ۔ اس کا ایک ایک لفظ اللہ کی طرف سے ہے “ } ۔ { زمین کو اللہ تعالیٰ نے دو دن میں پیدا کیا ہے یعنی اتوار اور پیر کے دن ، اور زمین میں زمین کے اوپر ہی پہاڑ بنا دیئے اور زمین کو اس نے بابرکت بنایا ، تم اس میں بیج بوتے ہو درخت اور پھل وغیرہ اس میں سے پیدا ہوتے ہیں ۔ اور اہل زمین کو جن چیزوں کی احتیاج ہے وہ اسی میں سے پیدا ہوتی رہتی ہیں زمین کی یہ درستگی منگل بدھ کے دن ہوئی ۔ چار دن میں زمین کی پیدائش ختم ہوئی ۔ جو لوگ اس کی معلومات حاصل کرنا چاہتے تھے انہیں پورا جواب مل گیا ۔ زمین کے ہر حصے میں اس نے وہ چیز مہیا کر دی جو وہاں والوں کے لائق تھی ۔ مثلاً عصب یمن میں ۔ سابوری میں ابور میں ۔ طیالسہ رے میں ۔ یہی مطلب آیت کے آخری جملے کا ہے ۔ یہ بھی کہا گیا ہے کہ جس کی جو حاجت تھی اللہ تعالیٰ نے اس کیلئے مہیا کر دی ۔ اس معنی کی تائید اللہ کے اس فرمان سے ہوتی ہے «وَاٰتٰیکُمْ مِّنْ کُلِّ مَا سَاَلْتُمُوْہُ» ۱؎ (14-ابراھیم:34) ’ تم نے جو جو مانگا اللہ نے تمہیں دیا ‘ } ۔ «وَاللہُ اَعْلَمُ» پھر جناب باری نے آسمان کی طرف توجہ فرمائی وہ دھویں کی شکل میں تھا ، زمین کے پیدا کئے جانے کے وقت پانی کے جو بخارات اٹھے تھے ۔ اب دونوں سے فرمایا کہ ’ یا تو میرے حکم کو مانو اور جو میں کہتا ہوں ہو جاؤ خوشی سے یا ناخوشی سے ‘ ، سیدنا ابن عباس رضی اللہ عنہ فرماتے ہیں ” مثلاً آسمانوں کو حکم ہوا کہ سورج چاند ستارے طلوع کرے زمین سے فرمایا اپنی نہریں جاری کر اپنے پھل اگا وغیرہ ۔ دونوں فرمانبرداری کیلئے راضی خوشی تیار ہو گئے ۔ اور عرض کیا کہ ہم مع اس تمام مخلوق کے جسے تو رچانے والا ہے تابع فرمان ہے ۔ اور کہا گیا ہے کہ انہیں قائم مقام کلام کرنے والوں کیلئے کیا گیا اور یہ بھی کہا گیا ہے کہ زمین کے اس حصے نے کلام کیا جہاں کعبہ بنایا گیا ہے اور آسمان کے اس حصے نے کلام کیا جو ٹھیک اس کے اوپر ہے “ ۔ «وَاللہُ اَعْلَمُ» امام حسن بصری رحمہ اللہ فرماتے ہیں اگر آسمان و زمین اطاعت گزاری کا اقرار نہ کرتے تو انہیں سزا ہوتی جس کا احساس بھی انہیں ہوتا ۔ پس دو دن میں ساتوں آسمان اس نے بنا دیئے یعنی جمعرات اور جمعہ کے دن ۔ اور ہر آسمان میں اس نے جو جو چیزیں اور جیسے جیسے فرشتے مقرر کرنے چاہے مقرر فرما دیئے اور دنیا کے آسمان کو اس نے ستاروں سے مزین کر دیا جو زمین پر چمکتے رہتے ہیں اور جو ان شیاطین کی نگہبانی کرتے ہیں جو ملاء اعلیٰ کی باتیں سننے کیلئے اوپر چڑھنا چاہتے ہیں ۔ یہ تدبیرو اندازہ اس اللہ کا قائم کردہ ہے جو سب پر غالب ہے جو کائنات کے ایک ایک چپے کی ہر چھپی کھلی حرکت کو جانتا ہے ۔ ابن جریر رحمہ اللہ کی روایت میں ہے { یہودیوں نے نبی کریم صلی اللہ علیہ وسلم سے آسمان و زمین کی پیدائش کی بابت سوال کیا تو آپ صلی اللہ علیہ وسلم نے فرمایا کہ { اتوار اور پیر کے دن اللہ تعالیٰ نے زمین کو پیدا کیا اور پہاڑوں کو منگل کے دن پیدا کیا اور جتنے نفعات اس میں ہیں اور بدھ کے دن درختوں کو پانی کو شہروں کو اور آبادی اور ویرانے کو پیدا کیا تو یہ چار دن ہوئے ۔ اسے بیان فرما کر پھر آپ صلی اللہ علیہ وسلم نے اسی آیت کی تلاوت کی اور فرمایا کہ جمعرات والے دن آسمان کو پیدا کیا اور جمعہ کے دن ستاروں کو اور سورج چاند کو اور فرشتوں کو پیدا کیا تین ساعت کے باقی رہنے تک ۔ پھر دوسری ساعت میں ہرچیز میں آفت ڈالی جس سے لوگ فائدہ اٹھاتے ہیں ۔ اور تیسری میں آدم علیہ السلام کو پیدا کیا انہیں جنت میں بسایا ابلیس کو انہیں سجدہ کرنے کا حکم دیا ۔ اور آخری ساعت میں وہاں سے نکال دیا } ۔ یہودیوں نے کہا اچھا نبی کریم صلی اللہ علیہ وسلم پھر اس کے بعد کیا ہوا ؟ فرمایا : { پھر عرش پر مستوی ہو گیا } انہوں نے کہا سب تو ٹھیک کہا لیکن آخری بات یہ کہی کہ پھر آرام حاصل کیا ۔ اس پر نبی کریم صلی اللہ علیہ وسلم سخت ناراض ہوئے اور یہ آیت اتری «وَلَقَدْ خَلَقْنَا السَّمَاوَاتِ وَالْأَرْضَ وَمَا بَیْنَہُمَا فِی سِتَّۃِ أَیَّامٍ وَمَا مَسَّنَا مِن لٰغُوبٍ فَاصْبِرْ‌ عَلَیٰ مَا یَقُولُونَ وَسَبِّحْ بِحَمْدِ رَ‌بِّکَ قَبْلَ طُلُوعِ الشَّمْسِ وَقَبْلَ الْغُرُ‌وبِ» ۱؎ (50-ق:38-39) یعنی ’ ہم نے آسمان و زمین اور جو ان کے درمیان ہے سب کو چھ دن میں پیدا کیا اور ہمیں کوئی تھکان نہیں ہوئی ، تو ان کی باتوں پر صبر کر ‘ } ۔۱؎ (تفسیر ابن جریر الطبری:30429:) یہ حدیث غریب ہے ۔ اور روایت میں ہے سیدنا ابوہریرہ رضی اللہ عنہ فرماتے ہیں { میرا ہاتھ پکڑ کر رسول اللہ صلی اللہ علیہ وسلم نے فرمایا : { اللہ تعالیٰ نے مٹی کو ہفتے کے روز پیدا کیا اس میں پہاڑوں کو اتوار کے دن رکھا درخت پیر والے دن پیدا کئے مکروہات کو منگل کے دن نور کو بدھ کے دن پیدا کیا اور جانوروں کو زمین میں جمعرات کے دن پھیلا دیا اور جمعہ کے دن عصر کے بعد جمعہ کی آخری ساعت آدم کو پیدا کیا اور کل مخلوقات پوری ہوئی } } ۔۱؎ (صحیح مسلم:2789) مسلم اور نسائی میں یہ حدیث ہے لیکن یہ بھی غرائب صحیح میں سے ہے ۔ اور امام بخاری نے تاریخ میں اسے معلل بتایا ہے اور فرمایا ہے کہ اسے بعض راویوں نے سیدنا ابوہریرہ رضی اللہ عنہ سے اور انہوں نے اسے کعب احبار رحمہ اللہ سے روایت کیا ہے اور یہی زیادہ صحیح ہے ۔