سورة الدخان

طَعَامُ الْأَثِيمِ

گناہ گار کا کھانا ہے۔

طَعَامُ الْاَثِيْمِ: ’’ الْاَثِيْمِ ‘‘ سے مراد یہاں کافر و مشرک اور قیامت کا منکر ہے، کیونکہ پیچھے انھی کا ذکر آ رہا ہے اور آگے آیت (۵۰): ﴿ اِنَّ هٰذَا مَا كُنْتُمْ بِهٖ تَمْتَرُوْنَ﴾ (یہ ہے جس میں تم شک کیا کرتے تھے) سے بھی ظاہر ہے کہ یہ لوگ مومن نہیں ہوں گے، کیونکہ ایمان تو یقین کا نام ہے۔ سورۂ قلم میں بھی ’’اثيم‘‘ کا لفظ کافر کے متعلق آیا ہے، فرمایا: ﴿مَنَّاعٍ لِّلْخَيْرِ مُعْتَدٍ اَثِيْمٍ ﴾ [القلم : ۱۲ ] ’’ خیر کو بہت روکنے والا، حد سے بڑھنے والا، سخت گناہ گار ہے۔‘‘ سورۂ جاثیہ میں فرمایا: ﴿ وَيْلٌ لِّكُلِّ اَفَّاكٍ اَثِيْمٍ﴾ [الجاثیۃ : ۷ ] ’’بڑی ہلاکت ہے ہر سخت جھوٹے، گناہ گار کے لیے۔‘‘