سورة الشعراء

تِلْكَ آيَاتُ الْكِتَابِ الْمُبِينِ

یہ واضح کتاب کی آیات ہیں۔

تِلْكَ اٰيٰتُ الْكِتٰبِ الْمُبِيْنِ: یہ تمہیدی فقرہ اس مضمون کے ساتھ پوری مناسبت رکھتا ہے جو اس سورت میں آگے بیان ہوا ہے۔ کفار مکہ نبی صلی اللہ علیہ وسلم سے کوئی نشانی (معجزہ) مانگتے تھے، تاکہ اسے دیکھ کر انھیں اطمینان ہو جائے کہ آپ واقعی یہ پیغام اللہ کی طرف سے لائے ہیں۔ فرمایا، اگر کسی کو ایمان لانے کے لیے نشانی کی طلب ہے تو کتابِ مبین کی یہ آیات موجود ہیں، مزید کسی معجزے کی ضرورت نہیں۔ اس بات کو اللہ تعالیٰ نے اس سورت میں ہر واقعہ کے آخر پر دہرایا ہے: ﴿اِنَّ فِيْ ذٰلِكَ لَاٰيَةً﴾ [الشعراء : ۸ ] ’’بے شک اس میں یقیناً عظیم نشانی ہے۔‘‘ یعنی قرآن میں آنے والی ہر آیت اور ہر واقعہ ہی معجزہ ہے، جو قرآن کے من جانب اللہ ہونے کی دلیل ہے اور جس کا جواب لانے سے پوری مخلوق عاجز ہے۔