سورة الجن - آیت 20

قُلْ إِنَّمَا أَدْعُو رَبِّي وَلَا أُشْرِكُ بِهِ أَحَدًا

کہہ دے میں تو صرف اپنے رب کو پکارتا ہوں اور میں اس کے ساتھ کسی کو شریک نہیں کرتا۔

(20) آیت (20)سے (23) تک کا سبب نزول یہ ہے کہ کفار قریش نے نبی کریم (ﷺ) سے کہا کہ تم نے ایک بڑی بات کا دعویٰ کردیا ہے اور اپنے لئے تمام لوگوں کی عداوت خرید لی ہے، تم اپنی اس دعوت سے باز آجاؤ، اور ہم لوگ تمہاری حفاظت کریں گے تو اللہ تعالیٰ نے آپ کو وہ باتیں کہنے کا حکم دیا جن کا ذکر ان آیات میں آیا ہے : اللہ تعالیٰ نے فرمایا : اے میرے نبی ! آپ کہہ دیجیے کہ میں اپنے رب کی عبادت کرتا ہوں اور صرف اسی کو پکارتاہوں، اور اس کے ساتھ کسی کو شریک نہیں بناتا ہوں اور یہ کوئی ایسی بری بات نہیں ہے جس کے سبب تم سب میری عداوت پر متفق ہوگئے ہو۔