سورة الممتحنة - آیت 5

رَبَّنَا لَا تَجْعَلْنَا فِتْنَةً لِّلَّذِينَ كَفَرُوا وَاغْفِرْ لَنَا رَبَّنَا ۖ إِنَّكَ أَنتَ الْعَزِيزُ الْحَكِيمُ

ترجمہ عبدالسلام بھٹوی - عبدالسلام بن محمد

اے ہمارے رب ! ہمیں ان لوگوں کے لیے آزمائش نہ بنا جنھوں نے کفر کیا اور ہمیں بخش دے اے ہمارے رب ! یقیناً تو ہی سب پر غالب، کمال حکمت والا ہے۔

تفسیرتیسیرارحمٰن - محمد لقمان سلفی

(5) اے ہمارے رب ! تو کافروں کو ہم پر غلبہ نہ دے کر وہ ہمیں آزمائش میں ڈال دیں اور دوبارہ ہمیں کفر میں واپس لے جانے کی کوشش کریں، اور اس زعم باطل میں مبتلا ہوجائیں کہ وہی حق پر ہیں اور ہم باطل پر ہیں اور ان کا کفر اور بڑھ جائے، اے ہمارے رب ! ہمارے اگلے اور پچھلے گناہوں کو معاف کر دے اور ان پر ہمارا مواخذہ نہ کر تو بڑا ہی زبردست اور بڑی حکمتوں والا ہے۔