سورة الذاريات

وَفِي أَمْوَالِهِمْ حَقٌّ لِّلسَّائِلِ وَالْمَحْرُومِ

اور ان کے مالوں میں سوال کرنے والے اور محروم کے لیے ایک حصہ تھا۔

اور اپنے مال میں مانگنے والے اور نہ مانگنے والے محتاجوں اور فقیروں کا حق سمجھتے تھے۔ قتادہ کہتے ہیں کہ ” سائل“ سے مراد وہ محتاج ہے جو ہاتھ پھیلا کر مانگتا ہے، اور ” محروم“ سے مراد وہ ہے جو کسی سے اپنی حاجت بیان نہیں کرتا ہے، اس لئے لوگ اسے مالدار سمجھ کر کچھ نہیں دیتے ہیں۔ ابن ابی حاتم نے ابن عباس رضی اللہ عنہما سے روایت کی ہے کہ اہل تقویٰ فرض زکاۃ ادا کرنے کے بعد بھی اپنے مال میں محتاج و محروم مسلمانوں کا حق سمجھتے ہیں، صلہ رحمی کرتے ہیں، میزبانی کرتے ہیں اور پریشان حال لوگوں کی ضرورت پوری کرتے ہیں۔