سورة الانعام - آیت 124

وَإِذَا جَاءَتْهُمْ آيَةٌ قَالُوا لَن نُّؤْمِنَ حَتَّىٰ نُؤْتَىٰ مِثْلَ مَا أُوتِيَ رُسُلُ اللَّهِ ۘ اللَّهُ أَعْلَمُ حَيْثُ يَجْعَلُ رِسَالَتَهُ ۗ سَيُصِيبُ الَّذِينَ أَجْرَمُوا صَغَارٌ عِندَ اللَّهِ وَعَذَابٌ شَدِيدٌ بِمَا كَانُوا يَمْكُرُونَ

ترجمہ عبدالسلام بھٹوی - عبدالسلام بن محمد

اور جب ان کے پاس کوئی نشانی آتی ہے تو کہتے ہیں ہم ہرگز ایمان نہیں لائیں گے، یہاں تک کہ ہمیں اس جیسا دیا جائے جو اللہ کے رسولوں کو دیا گیا، اللہ زیادہ جاننے والا ہے جہاں وہ اپنی رسالت رکھتا ہے۔ عنقریب ان لوگوں کو جنھوں نے جرم کیے، اللہ کے ہاں بڑی ذلت پہنچے گی اور بہت سخت عذاب، اس وجہ سے کہ وہ فریب کیا کرتے تھے۔

تسہیل البیان فی تفسیر القرآن - ام عمران شکیلہ بنت میاں فضل حسین

کفار کا مطالبہ رسالت: یعنی ان کے پاس بھی فرشتے وحی لے کر آئیں اور ان کے سروں پر بھی نبوت و رسالت کا تاج رکھا جائے۔ ایمان اور اطاعت کے بغیر انبیاء جیسا مقام چاہتے ہیں رسولوں جیسا علم چاہتے ہیں۔ یہ فیصلہ کرنا تو اللہ ہی کا کام ہے کہ کس کو نبی بنایا جائے کیونکہ وہی ہر بات کی حکمت و مصلحت کو جانتا ہے اور اسے ہی معلوم ہے کہ کون اس منصب کا اہل ہے۔ جب بھی رسولوں کو نبوت ملی انھیں پہلے سے اس کا علم نہیں تھا۔ نہ نبوت ذاتی کوششوں سے ہی ملتی ہے۔ یہ تو رب کی رحمت سے ملتی ہے اللہ جانتا ہے کہ نبوت مکہ کے رئیس کو یا جناب عبداللہ اور حضرت آمنہ کے درِ یتیم کو ملنی ہے۔ یہ لوگ جو کچھ کررہے ہیں تکبر اور سرکشی کی بنا پر کررہے ہیں حق کے راستے میں مکر و فریب کے جوکانٹے بچھا رہے ہیں اس کی پاداش میں ذلت و رسوائی کے عذاب سے اس دنیا میں بھی اور آخرت میں بھی دوچار ہونا پڑے گا۔ رسول اللہ صلی اللہ علیہ وسلم نے فرمایا: قیامت کے دن ہر دھوکے باز کے لیے ایک جھنڈا بلند کیا جائے گا اور کہا جائے گا یہ فلاں فلاں کا دھوکے باز ہے۔ (بخاری: ۶۱۷۷)