يَا أَهْلَ الْكِتَابِ قَدْ جَاءَكُمْ رَسُولُنَا يُبَيِّنُ لَكُمْ عَلَىٰ فَتْرَةٍ مِّنَ الرُّسُلِ أَن تَقُولُوا مَا جَاءَنَا مِن بَشِيرٍ وَلَا نَذِيرٍ ۖ فَقَدْ جَاءَكُم بَشِيرٌ وَنَذِيرٌ ۗ وَاللَّهُ عَلَىٰ كُلِّ شَيْءٍ قَدِيرٌ
اے اہل کتاب! بے شک تمھارے پاس ہمارا رسول آیا ہے، جو تمھارے لیے کھول کر بیان کرتا ہے، رسولوں کے ایک وقفے کے بعد، تاکہ تم یہ نہ کہو کہ ہمارے پاس نہ کوئی خوشخبری دینے والا آیا اور نہ ڈرانے والا، تو یقیناً تمھارے پاس ایک خوشخبری دینے والا اور ڈرانے والا آچکا ہے اور اللہ ہر چیز پر پوری طرح قادر ہے۔
اہل کتاب کو نبی آخرالزماں کا انتظار: بنی اسرائیل میں ایک ہی زمانہ میں متعدد انبیاء مبعوث ہوتے رہے، دینی قیادت اور دنیاوی قیادت بھی انہی کے پاس تھی۔ حضرت عیسیٰ علیہ السلام کے بعد نبوت کا سلسلہ کم و بیش چھ سو سال تک بند رہا۔ اس کے بعد نبی آخرالزماں مبعوث ہوئے یہودی اور عیسائی انتظار میں تھے کہ جب نبی آخرالزماں آئے گا تو ہم ان کے ساتھ مل کر مشرکین کو شکست دیں گے۔ مگر آپ صلی اللہ علیہ وسلم بنی اسماعیل میں تشریف لے آئے۔ یہود نے ان کو پہچان لینے کے بعد صرف اس بنا پر انکار کردیا کہ آپ بنی اسرائیل میں سے نہ تھے۔ انہی یہود کو اللہ تعالیٰ مخاطب کرکے فرمارہے ہیں کہ جس بشیر و نذیر کا تمہیں انتظار تھا وہ آچکا، لہٰذا اگر اب تم نے انکار کیا تو خوب جان لو کہ اللہ تمہیں اس جرم کفر کی سزا دینے پر قادر ہے۔