سورة المرسلات

وَيْلٌ يَوْمَئِذٍ لِّلْمُكَذِّبِينَ

اس دن جھٹلانے والوں کے لیے بڑی ہلاکت ہے۔

جھٹلانے والوں كے لیے تباہی ہے: تباہی اس لیے كہ اللہ كی آیات كو جھٹلانے والوں كے لیے یہ ایك ناگہانی آفت ہوگی، ان كے وہم و گمان میں بھی نہ ہوگا كہ قیامت فی الواقع آجائے گی اور جب قیامت آجائے گی تو انھیں اپنی ہلاكت کے سوا كوئی راہ نہ سجھائی دے گی۔ واضح رہے كہ اس سورت میں یہ آیت بار بار دہرائی گئی ہے۔ اس لیے كہ ہر مكذب كا جرم ایك دوسرے سے مختلف نوعیت كا ہوگا۔ اور اسی حساب سے عذاب كی نوعیتیں بھی مختلف ہوں گی۔ بنا بریں ویل جہنم كی وادی كی مختلف قسمیں ہیں۔ جسے مختلف مكذبین كے لیے الگ الگ بیان كیا گیا ہے۔ (فتح القدیر)