سورة ق - آیت 16

وَلَقَدْ خَلَقْنَا الْإِنسَانَ وَنَعْلَمُ مَا تُوَسْوِسُ بِهِ نَفْسُهُ ۖ وَنَحْنُ أَقْرَبُ إِلَيْهِ مِنْ حَبْلِ الْوَرِيدِ

اور بلا شبہ یقیناً ہم نے انسان کو پیدا کیا اور ہم ان چیزوں کو جانتے ہیں جن کا وسوسہ اس کا نفس ڈالتا ہے اور ہم اس کی رگ جاں سے بھی زیادہ اس کے قریب ہیں۔

چوں کہ انسان کو ہم نے پیدا کیا ہے اسی لیے اس کی فطرت کو سب سے زیادہ جاننے والا ہم سے زیادہ کون ہو سکتا ہے۔ یہاں تک کہ انسان کے دل میں جو بھلے برے خیالات پیدا ہوتے ہیں انہیں بھی وہ جانتا ہے۔ ایک صحیح حدیث میں آتا ہے کہ ’’اللہ تعالیٰ نے میری اُمت کے دل میں جو خیالات آئیں ان سے درگزر فرما لیا ہے۔ جب تک کہ وہ زبان سے نہ نکال لیں یا ان پر عمل نہ کریں۔ (بخاری: ۲۵۲۸، مسلم: ۱۲۰۷)