سورة الفتح - آیت 2

لِّيَغْفِرَ لَكَ اللَّهُ مَا تَقَدَّمَ مِن ذَنبِكَ وَمَا تَأَخَّرَ وَيُتِمَّ نِعْمَتَهُ عَلَيْكَ وَيَهْدِيَكَ صِرَاطًا مُّسْتَقِيمًا

ترجمہ عبدالسلام بھٹوی - عبدالسلام بن محمد

تاکہ اللہ تیرے لیے بخش دے تیرا کوئی گناہ جو پہلے ہوا اور جو پیچھے ہوا اور اپنی نعمت تجھ پر پوری کرے اور تجھے سیدھے راستے پر چلائے۔

تسہیل البیان فی تفسیر القرآن - ام عمران شکیلہ بنت میاں فضل حسین

آپ کے گناہوں کی معافی: اس سے مراد وہ امور ہیں جو آپ صلی اللہ علیہ وسلم نے اپنے فہم و اجتہاد سے کیے۔ لیکن اللہ نے انھیں ناپسند فرمایا، جیسے عبداللہ بن اُم مکتوم رضی اللہ عنہ کا واقعہ جس پر سورہ عبس کا نزول ہوا۔ سورہ التوبہ (۴۳) میں ارشاد فرمایا: ﴿عَفَا اللّٰهُ عَنْكَ لِمَ اَذِنْتَ لَهُمْ﴾ ’’اللہ آپ کو معاف فرمائے آپ نے منافقوں کو کیوں (جہاد سے رخصت کی) اجازت دی۔‘‘ یہ معاملات و امور اگرچہ گناہ اور منافی عصمت نہیں، لیکن آپ صلی اللہ علیہ وسلم کی شاں ارفع کے پیش نظر انھیں بھی کوتاہیاں شمار کر لیا گیا۔ جس پر معافی کا اعلان فرمایا جا رہا ہے۔