سورة آل عمران - آیت 168

الَّذِينَ قَالُوا لِإِخْوَانِهِمْ وَقَعَدُوا لَوْ أَطَاعُونَا مَا قُتِلُوا ۗ قُلْ فَادْرَءُوا عَنْ أَنفُسِكُمُ الْمَوْتَ إِن كُنتُمْ صَادِقِينَ

ترجمہ عبدالسلام بھٹوی - عبدالسلام بن محمد

جنھوں نے اپنے بھائیوں کے بارے میں کہا اور خود بیٹھے رہے، اگر وہ ہمارا کہنا مانتے تو قتل نہ کیے جاتے۔ کہہ دے پھر اپنے آپ سے موت کو ہٹا دینا، اگر تم سچے ہو۔

تسہیل البیان فی تفسیر القرآن - ام عمران شکیلہ بنت میاں فضل حسین

منافقین خود تو جہاد میں حصہ نہیں لیتے تھے دوسرے ان کے جو بھائی جہاد میں حصہ لے رہے تھے انھیں ملامت شروع کردی کہ اگر وہ ہماری بات مان لیتے تو قتل نہ کیے جاتے، اللہ تعالیٰ نے فرمایا کہ اگر تم سچے ہو تو اپنے سے موت کو ٹال کر دکھاؤ۔ مطلب یہ ہے کہ تقدیر سے کسی کو مفر نہیں۔ موت جہاں اور جیسے مقدر میں ہے وہاں اُسی صورت میں آکر رہے گی اس لیے جہاد اور اللہ کی راہ میں لڑنے سے فرار اور گریز کسی کی موت کو نہیں ٹال سکتا۔