أُولَٰئِكَ جَزَاؤُهُم مَّغْفِرَةٌ مِّن رَّبِّهِمْ وَجَنَّاتٌ تَجْرِي مِن تَحْتِهَا الْأَنْهَارُ خَالِدِينَ فِيهَا ۚ وَنِعْمَ أَجْرُ الْعَامِلِينَ
یہ لوگ ہیں جن کی جزا ان کے رب کی طرف سے بڑی بخشش اور ایسے باغات ہیں جن کے نیچے سے نہریں بہتی ہیں، ہمیشہ ان میں رہنے والے ہیں اور (یہ) عمل کرنے والوں کا اچھا اجر ہے۔
یہ مضمون قرآن کریم میں بہت سے مقامات پر آیا ہے کہ ذرا زمین میں چل پھر کر دیکھو کہ جن لوگوں نے انبیاء اور اللہ کی آیات کو جھٹلایا ان کا کیا انجام ہوا تھا۔ مثلاً قوم عاد،قوم ثمود، قوم نوح، قوم اصحاب مدین، اصحاب الحجر، قوم سبا وغیرہ کاکیا حشر ہوا، اسی طرح بعض اشخاص مثلاً فرعون اور آل فرعون کا کیا حشر ہوا۔ ایسے سب واقعات سے اللہ کی جو عادت جاریہ معلوم ہوتی ہے وہ یہ ہے کہ جب کوئی قوم اللہ کی نافرمانی میں انتہا کو پہنچ جاتی ہے اور گناہوں میں ڈوب جاتی ہے۔ تو اللہ تعالیٰ اسے تباہ و برباد کردیتا ہے اور اس کا نام صفحہ ہستی سے مٹ جاتا ہے اور یہ اللہ کی ایسی سنت ہے جو پوری ہوکر رہتی ہے۔ یقین نہ آئے تو زمین میں چل پھر کر دیکھ لو۔