سورة آل عمران - آیت 128

لَيْسَ لَكَ مِنَ الْأَمْرِ شَيْءٌ أَوْ يَتُوبَ عَلَيْهِمْ أَوْ يُعَذِّبَهُمْ فَإِنَّهُمْ ظَالِمُونَ

ترجمہ عبدالسلام بھٹوی - عبدالسلام بن محمد

تیرے اختیار میں اس معاملے سے کچھ بھی نہیں، یا وہ ان پر مہربانی فرمائے، یا انھیں عذاب دے، کیوں کہ بلا شبہ وہ ظالم ہیں۔

تسہیل البیان فی تفسیر القرآن - ام عمران شکیلہ بنت میاں فضل حسین

اس آیت کا سبب نزول یہ واقعہ ہے کہ جنگ اُحد میں رسول اللہ صلی اللہ علیہ وسلم کا سامنے كے دانت ٹوٹ گئے اور سرزخمی ہوگیا۔ آپ صلی اللہ علیہ آلہ وسلم اپنے چہرے سے خون پونچھتے جاتے اور فرماتے ’’وہ قوم کیسے فلاح پائے گی جس نے اپنے نبی کا سر زخمی کردیا اور دانت توڑ دیاحالانکہ وہ انھیں اللہ کی طرف دعوت دے رہا تھا۔‘‘ (بخاری: ۴۰۶۹، مسلم: ۱۷۹۱) تو اس موقعہ پر یہ آیت نازل ہوئی، چنانچہ حدیث میں آتا ہے عبداللہ بن عمر سے روایت ہے کہ فجر کی نماز دوسری رکعت سے سر اٹھا کر بد دعا کی، رکوع کے بعد پھر بد دعا کی تو اللہ نے یہ آیت اتاری کہ آپ کو فیصلہ کرنے کا کوئی حق نہیں۔ (بخاری : ۴۰۶۹) مختار کل اور عالم الغیب صرف اللہ تعالیٰ ہے: یہ قبیلے جن کے لیے آپ بد دعا فرماتے رہے انھیں اللہ تعالیٰ نے آپ کے قدموں میں لا ڈالا اور اسلام کے جانباز سپاہی بنادیا۔