سورة الصافات

فَإِنَّهُمْ لَآكِلُونَ مِنْهَا فَمَالِئُونَ مِنْهَا الْبُطُونَ

پس بے شک وہ یقیناً اس میں سے کھانے والے ہیں، پھر اس سے پیٹ بھرنے والے ہیں۔

اہل دوزخ کی خوراک: اسی بد منظر، بدبودار، بد ذائقہ، بد مزہ، بد خصال درخت کو انھیں جبراً کھانا پڑے گا۔ اور ٹھونس ٹھونس کر انھیں کھلایا جائے گا۔ کھانے کے بعد انھیں پانی کی طلب ہو گی تو پیپ ملا کھولتا ہوا گرم پانی انھیں دیا جائے گا جس کے پینے سے ان کی انتڑیاں کٹ جائیں گے (سورہ محمد ۱۵) نبی صلی اللہ علیہ وسلم نے ایک بار ﴿اتَّقُوا اللّٰهَ حَقَّ تُقٰتِهٖ﴾ (آل عمران: ۱۰۲) آیت تلاوت کر کے فرمایا۔ اگر زقوم کا ایک قطرہ دنیا کے سمندروں میں پڑ جائے تو روئے زمین کے تمام لوگوں کی خوراکیں خراب ہو جائیں۔ اس کا کیا حال ہو گا جس کی خوراک ہی یہی ہو۔ (ترمذی: ۲۵۸۵۔ ابن ماجہ: ۴۳۲۵)