سورة آل عمران - آیت 6

هُوَ الَّذِي يُصَوِّرُكُمْ فِي الْأَرْحَامِ كَيْفَ يَشَاءُ ۚ لَا إِلَٰهَ إِلَّا هُوَ الْعَزِيزُ الْحَكِيمُ

ترجمہ عبدالسلام بھٹوی - عبدالسلام بن محمد

وہی ہے جو رحموں میں تمھاری صورت بناتا ہے، جس طرح چاہتا ہے، اس کے سوا کوئی معبود نہیں، سب پر غالب، کمال حکمت والا ہے۔

تسہیل البیان فی تفسیر القرآن - ام عمران شکیلہ بنت میاں فضل حسین

ا س آیت میں اللہ تعالیٰ نے دو اہم حقیقتوں کی طرف اشارہ کیا ہے۔ (۱)تمہاری فطرت کو جیسا وہ جانتا ہے نہ تم جان سکتے ہو اور نہ کوئی دوسرا جان سکتا ۔ (۲)جس نے تمہارے استقرار حمل سے لیکر بعد کے مراحل تک ہر موقع پر تمہاری چھوٹی سے چھوٹی ضرورتوں تک کو پورا کرنے کا اہتمام کیا، کس طرح ممکن تھا کہ وہ دنیا میں تمہاری زندگی میں ہدایت و راہنمائی کا انتظام نہ کرتا۔ ماں باپ نہیں جانتے کہ رحم مادر میں کیا ہے مگر اللہ جانتا ہے اتنے گہرے اندھیرے میں اللہ بچے کی صورت بناتا ہے جیسے وہ چاہتا ہے خوبصورت بنادے یا بدصورت۔ اللہ تعالیٰ تصویر اور تقدیر پر غالب ہے اور وہ حکمت والا ہے۔