معبود ان باطل جہنم میں: یہ آیت مشرکین کے بارے میں نازل ہوئی۔ جو لات، منات، عزیٰ و ہبل کی پوجا کیا کرتے تھے یہ سب پتھر کی مورتیاں تھیں سو کہا جا رہا ہے کہ تم بھی اور تمھارے یہ معبود بھی، جن کی مورتیاں بنا کر تم نے عبادت کے لیے رکھی ہوئی ہیں سب جہنم کا ایندھن ہیں۔ پتھر کی مورتیوں کا اگرچہ اس میں کوئی قصور نہیں کیونکہ وہ تو غیر عاقل اور بے شعور ہیں لیکن انھیں پجاریوں کے ساتھ جہنم میں صرف مشرکوں کو مزید ذلیل و رسوا کرنے کے لیے ڈالا جائے گا کہ جن معبودوں کو تم اپنا سہارا سمجھتے تھے وہ بھی تمھارے ساتھ ہی جہنم میں جہنم کا ایندھن ہیں۔ جیسا کہ سورۂ بقرہ میں فرمایا: (وَقُوْدُھَا النَّاسُ وَالْحِجَارَۃُ) جہنم کا ایندھن آدمی بھی ہوں گے اور پتھر بھی۔