سورة الأنبياء

أَمِ اتَّخَذُوا آلِهَةً مِّنَ الْأَرْضِ هُمْ يُنشِرُونَ

یا انھوں نے زمین سے کوئی معبود بنا لیے ہیں، جو زندہ کریں گے۔

الٰہ وہی ہو سکتا ہے جو زندگی بخشے: یُنْشِرُوْنَ کا مطلب ہے کہ کسی بے جان چیز میں روح پھونک کر اسے زندہ کرنا، جِلا دینا۔ اس لحاظ سے اس جملہ کے دو مطلب ہو سکتے ہیں۔ ایک تو وہ جو ترجمہ میں بیان کیا گیا ہے کہ آیا ان معبودوں میں یہ طاقت ہے کہ جب وہ عذاب الٰہی سے ہلاک ہو جائیں تو ان کے معبود انھیں دوبارہ زندہ کر کے دکھائیں اور دوسرا مطلب یہ ہے کہ کیا ان میں یہ طاقت ہے کہ وہ کسی بھی مادہ اور بے جان چیز میں روح پھونک کر اسے زندہ بنا دیں اگر وہ یہ کام نہیں کر سکتے تو پھر الٰہ کیسے بن سکتے ہیں۔