سورة طه - آیت 112

وَمَن يَعْمَلْ مِنَ الصَّالِحَاتِ وَهُوَ مُؤْمِنٌ فَلَا يَخَافُ ظُلْمًا وَلَا هَضْمًا

اور جو شخص اچھی قسم کے اعمال کرے اور وہ مومن ہو تو وہ نہ کسی بے انصافی سے ڈرے گا اور نہ حق تلفی سے۔

یعنی اعمال کی جزا کے لیے دوشرائط کا ہونا ضروری ہے۔ ایک ایمان بالغیب کے تمام اجزا پر ایمان لانا، دوسرے ایسے اعمال صالحہ جو شریعت کی پابندیوں کو ملحوظ رکھ کر بجا لائے گئے ہوں مثلاً ان میں ریاکاری نہ ہو، سنت کے مطابق ہوں اور بعد میں احسان جتلا کر یا شرک کرکے ان اعمال کو برباد نہ کر دیا گیا ہو۔ ایسے اعمال کا بدلہ ضرور اور پورا پورا ملے گا۔ تفسیر طبری میں ہے کہ گناہ کی زیادتی اور نیکی کی کمی سے وہ بے خوف ہیں۔ نہ ان کی برائیاں بڑھائی جائیں گی اور نہ نیکیاں گھٹائی جائیں گی۔