سورة طه - آیت 54

كُلُوا وَارْعَوْا أَنْعَامَكُمْ ۗ إِنَّ فِي ذَٰلِكَ لَآيَاتٍ لِّأُولِي النُّهَىٰ

کھاؤ اور اپنے چوپایوں کو چراؤ، بے شک اس میں عقلوں والوں کے لیے یقیناً بہت سی نشانیاں ہیں۔

یعنی اللہ تعالیٰ نے تمام جاندار مخلوق کی روزی کا خواہ وہ انسان ہوں یا حیوانات ہوں ایسا مستقل اور مستحکم نظام پیدا کر دیا جس سے تمام مخلوق کو روزی مہیا ہوتی رہتی ہے۔ اللہ کا نظام پیداوار اور اُس کے عوامل یعنی سورج کی حرارت، ہواؤں کا چلنا، سمندروں سے بخارات کا اُٹھنا موزوں موسم میں بارش کا اترنا، پھر اس سے زمین کا لہلہا اُٹھنا۔ ان سب باتوں میں ایسی ہم آہنگی ہے۔ جس سے ہر صاحب بصیرت اس نتیجہ پر پہنچ سکتا ہے کہ اس کائنات کی مدبر منتظم صرف ایک ہی ہستی ہو سکتی ہے۔