سورة طه - آیت 42

اذْهَبْ أَنتَ وَأَخُوكَ بِآيَاتِي وَلَا تَنِيَا فِي ذِكْرِي

تو اور تیرا بھائی میری آیات لے کر جاؤ اور میری یاد میں سستی نہ کرنا۔

اللہ کے ذکر کا فائدہ: سیدنا ہارون علیہ السلام کو نبوت عطا کرکے سیدنا موسیٰ علیہ السلام کا مدد گار بنا دیا تو فرمایا: میری دی ہوئی دلیل اور معجزے لے کر تو اور تیرا بھائی فرعون کے پاس جاؤ اور میری یاد سے غفلت نہ کرنا، تھک کر نہ بیٹھ جانا۔ چنانچہ فرعون کے سامنے دونوں ذکر اللہ میں لگے رہتے۔ تاکہ اللہ کی مدد ان کے ساتھ ہو۔ کیونکہ اللہ کا ذکر ہی وہ چیز ہے جو اللہ والوں کی کامیابی کا ذریعہ اور دشمن کے مقابلہ میں بہترین ہتھیار ہے۔ اس سے اللہ کی طرف لو لگائے رکھنے اور اللہ پر بھروسہ کرنے کی صفت پیدا ہوتی ہے۔ پھر اس راہ میں جو بھی مصائب پیش آئیں ان کو صبر و استقلال سے برداشت کرنے کی قوت پیدا ہوتی ہے۔