وَلَا تَقْرَبُوا مَالَ الْيَتِيمِ إِلَّا بِالَّتِي هِيَ أَحْسَنُ حَتَّىٰ يَبْلُغَ أَشُدَّهُ ۚ وَأَوْفُوا بِالْعَهْدِ ۖ إِنَّ الْعَهْدَ كَانَ مَسْئُولًا
اور یتیم کے مال کے قریب نہ جاؤ، مگر اس طریقے سے جو سب سے اچھا ہو، یہاں تک کہ وہ اپنی جوانی کو پہنچ جائے اور عہد کو پورا کرو، بے شک عہد کا سوال ہوگا۔
کسی کی جان کو ناجائز طریقے سے ضائع کرنے کی ممانعت کے بعد یتیم کے مال کو ضائع کرنے سے روکا جارہا ہے۔ اس لیے فرمایا، یتیم کے مال میں بدنیتی نہ کرو ہیر پھیر نہ کرو ۔ ان کے مال بالغ ہونے تک ایسے طریقے سے استعمال کرو جس میں اس کا فائدہ ہو جس کی پرورش میں یہ یتیم بچے ہوں اگر وہ خود مال دار ہے۔ تب تو اسے یتیموں کے مال سے بالکل الگ رہنا چاہیے اور اگر وہ فقیر و محتاج ہے تو معروف طریقے سے کھا سکتا ہے۔ صحیح مسلم میں ہے کہ نبی صلی اللہ علیہ وسلم نے حضرت ابوذر رضی اللہ عنہ سے فرمایا: میں تو تجھے بہت کمزور دیکھ رہا ہوں اور تیرے لیے وہی پسند فرماتا ہوں جو خود اپنے لیے چاہتا ہوں خبردار! کبھی دو شخصوں کا والی نہ بننااو رنہ کبھی یتیم کے مال کا متولی بننا۔ (مسلم: ۱۸۲۶) ایفائے عہد: عہد سے مراد وہ میثاق جو اللہ اور بندے کے درمیان ہے جسے عہد الست کہتے ہیں اور وہ بھی جو انسان آپس میں ایک دوسرے سے کرتے ہیں، لین دین کے وعدے، ان کا سب کا پورا کرنا ضروری ہے۔ قیامت کے دن ان سب کے بارے میں جواب دہی ہوگی۔