وَاللَّهُ أَنزَلَ مِنَ السَّمَاءِ مَاءً فَأَحْيَا بِهِ الْأَرْضَ بَعْدَ مَوْتِهَا ۚ إِنَّ فِي ذَٰلِكَ لَآيَةً لِّقَوْمٍ يَسْمَعُونَ
اور اللہ نے آسمان سے کچھ پانی نازل کیا، پھر اس کے ساتھ زمین کو اس کے مرنے کے بعد زندہ کردیا۔ بلاشبہ اس میں ان لوگوں کے لیے یقیناً ایک نشانی ہے جو سنتے ہیں۔
زمین خشک اور بالکل بے آب و گیاہ پڑی ہوتی ہے مگر برسات کے موسم میں ہر طرف جڑی بوٹیاں، گھاس، درخت،پودے وغیرہ از خود پیدا ہونے لگتے ہیں جن کے بیج مدتوں پہلے زمین میں دبے ہوئے تھے، پھر اس موسم میں مینڈک اور کئی قسم کے حشرات الارض بھی پیداہوجاتے ہیں جن کا نام ونشان تک مٹ چکاہوتاہے اور یہ منظر تم اپنی زندگی میں بار بار دیکھتے ہو۔ بالکل ایسی ہی صورت حال انسان کو دوبارہ پیدائش کی ہوگی ۔ انسان کا جسم خواہ مٹی میں مل کر مٹی بن چکاہو، نفخہ صور ثانی یا روحانی قسم کی بارش سے دوبارہ جی اٹھیں گے۔