سورة یوسف - آیت 34

فَاسْتَجَابَ لَهُ رَبُّهُ فَصَرَفَ عَنْهُ كَيْدَهُنَّ ۚ إِنَّهُ هُوَ السَّمِيعُ الْعَلِيمُ

ترجمہ عبدالسلام بھٹوی - عبدالسلام بن محمد

34-12 تو اس کے رب نے اس کی دعا قبول کرلی، پس اس سے ان (عورتوں) کا فریب ہٹا دیا۔ بے شک وہی سب کچھ سننے والا، سب کچھ جاننے والا ہے۔

تسہیل البیان فی تفسیر القرآن - ام عمران شکیلہ بنت میاں فضل حسین

اللہ تعالیٰ کریم وقار نے آپ علیہ السلام کی دعا قبول فرمائی اور آپ کو بال بال بچا لیا۔ آپ کو عصمت و عفت عطا فرمائی اپنی حفاظت میں رکھا۔ باوجود بھرپور جوانی کے، باوجود بے انتہا حسن و خوبی کے، باوجود ہر طرح کے کمال کے جو آپ علیہ السلام میں تھا آپ علیہ السلام اپنی خواہش نفس کی تکمیل سے بچتے رہے۔ اس عورت کی طرف رخ بھی نہ کیا جو رئیس زادی ہے۔ رئیس کی بیوی ہے۔ ان کی مالکہ ہے۔بہت ہی خوبصورت ہے۔ جمال کے ساتھ مال بھی ہے ریاست بھی۔ وہ اپنی بات ماننے پر انعام و اکرام اور نہ ماننے پر جیل جانے اور سخت سزا کا حکم سنا رہی ہے۔ لیکن آپ کے دل میں خوف خدا کا سمندر موجزن تھا۔ آپ علیہ السلام اپنے اس دنیوی آرام اور عیش و لذت کو رب کے نام پر قربان کرتے ہیں اور قید وبند کو اس پر ترجیح دیتے ہیں تاکہ اللہ کے عذابوں سے بچ جائیں اور آخرت میں ثواب کے مستحق بن جائیں۔